Fabaceae කුළයේ Phaseolus ගණයට අයත් බෝංචි, ශ්‍රී ලංකාවේ බදුල්ල, නුවරඑළිය, මාතලේ හා මහනුවර දිස්ත්‍රික්ක වල බහුලව වගාකරණු ලැබේ.  වැඩි උෂ්ණත්වය (>32 ⁰C) හා නොකඩවා පවතින අධික වර්ෂාව සහිත ප්‍රදේශ මෙම බෝගය සඳහා සුදුසු නොවේ. විශේෂයෙන් මල් පිපෙන අවධියේදී උෂ්ණත්වය 30⁰C වඩා අඩුවිය යුතු අතර එසේ නොවන විට එය මල් හා කරල් හටගැනීම කෙරෙහි අහිතකර ලෙස බලපායි. බෝංචි වගාව වැඩිපුරම දක්නට ලැබෙන්නේ උඩරට අතරමැදි කළාපයේ වුවද, උඩරට තෙත් කළාපයද වගාව සඳහා සුදුසු වේ.

ශ්‍රී ලංකාවේ වගාකරණු ලබන බෝංචි ප්‍රභේද, වැල් බෝංචි හා පඳුරු බෝංචි ලෙස ප්‍රධාන කාණ්ඩ දෙකකට වර්ග කරණු ලැබේ. මෙයින් වැල් බෝංචි ගොවීන් හා පාරිභෝගිකයන් අතර පඳුරු බෝංචි වලට වඩා වැඩි ජනප්‍රියතාවයක් ලබාගෙන ඇත. වැල් බෝංචිවල වර්ධන රටාව අනුව ඒ්වාට ආධාරක සැපයිය යුතුය. මෙලෙස ආධාරක සපයා වගාකිරීමෙන් වැඩි අස්වැන්නක් ලබාගතහැක. වැල් බෝංචි කරල් විශාල හා ලා කොළපැහැති වේ එහෙත් පඳුරු බෝංචිවල ප්‍රමාණයෙන් කුඩා තද කොළපැහැ කරල් දක්නට ලැබේ. එහෙයින් පඳුරු බෝංචි ප්‍රධාන වගාවකට වඩා ප්‍රධාන වගා දෙකක් අතර අතරමැදි කන්නයේ වගාවක් ලෙස පමණක් ගොවීන් අතර ජනප්‍රිය වී ඇත.