ප්‍රාදේශීය කෘෂිකර්ම පර්යේෂණ හා සංවර්ධන මධ්‍යස්ථානය (RARDC)-බණ්ඩාරවෙල

උඩරට අතරමැදි කලාපයේ වගාකරණු ලබන බෝග වල නිෂ්පාදනය හා ගුණාත්මය ඉහළ නැංවීම සඳහා අවශ්‍ය තාක්ෂණය ජනනය කිරීම උදෙසා 1972 වසරෙහි ආරම්භ කරණ ලද බණ්ඩාරවෙල ප්‍රාදේශීය කෘෂිකර්ම පර්යේෂණ හා සංවර්ධන මධ්‍යස්ථානය, මුහුදු මට්ටමේ සිට මීටර 1,400 ක් ඉහළින් බණ්ඩාරවෙල නගරයට ආසන්නයේ පිහිටා ඇත. මෙය ඌව පළාත සහ සබරගමු පළාතේ, බලන්ගොඩ කලාපයේ  (IU2, IM2, IM3, IL2 සහ WM3 කෘෂි පාරිසරික කලාප) වගා කරන කෘෂිකාර්මික බෝගවල අස්වැන්න හා ගුණාත්මය ඉහළ නැංවීම සඳහා සුදුසු තාක්ෂණයන් සංවර්ධනය කිරීමේ වගකීම දරන ප්‍රධාන ආයතනයයි. මෙය ගන්නෝරුවේ පිහිටා ඇති  උද්‍යාන  බෝග පර්යේෂණ හා සංවර්ධන ආයතනයේ උප ආයතනයක්  වන අතර උඩරට අතරමැදි කලාපයේ වගා කරනු ලබන ප්‍රධාන බෝග වන බෝංචි, තක්කාලි, ගෝවා, වෙනත් විදේශීය එළවළු බෝග, අර්තාපල්, ආරක්‍ෂිත ගෘහවල වගා කරන බෝග සහ මල් වගාව සම්බන්ධව  පර්යේෂණ කටයුතු සිදුකරනු ලබයි. මිට අමතරව ගොවීන් පුහුණු කිරීම, පාංශු පරීක්ෂාවෙන් පසු පොහොර නිර්දේශ ලබාදීම, ගොවීන්ගේ කෘෂිකාර්මික ගැටළු වලට විසදුම් ලබා දීම ඇතුළු බොහෝ කෘෂි තාක්‍ෂණික කටයුතු මෙහෙයවීමද මෙම ආයතනයේ කාර්යභාරයට අයත්වේ.