ජල කළමනාකරණය සහ භූගෝලීය තොරතුරු පද්ධති අංශය

වී ජල කළමනාකරණය පිළිබඳ අධ්‍යයනයන් 1966 දී මහා ඉලුප්පල්ලම කෘෂිකාර්මික පර්යේෂණ මධ්‍යස්ථානයේ දී ආරම්භ කර 1994 දක්වා සිදු කර ඇත. කෘෂිකර්ම දෙපාර්තමේන්තුව ප්‍රතිව්‍යුහගත කිරීමෙන් හා 1994 දී විශේෂිත පර්යේෂණ ස්ථාන පිහිටුවීමෙන් පසුව වී පිළිබඳව පර්යේෂණ කිරිිම වී පර්යේෂණ හා සංවර්ධන ආයතනයේ එකම වගකීම බවට පත් විය. කෙසේ වෙතත්, වී පර්යේෂණ හා සංවර්ධන ආයතනය පිහිටුවීමෙන් පසු ජල කළමනාකරණ පර්යේෂණ සඳහා වැඩි අවධානයක් යොමු නොවීය.  වී පර්යේෂණ හා සංවර්ධන ආයතනයෙහි වී වල ජල කළමනාකරණය පිළිබඳ පර්යේෂණ ආරම්භ කර ඇත්තේ ආචාර්ය ඩබ්ලිව්.එම්.ඩබ්ලිව්. වීරකෝන් විසින් 2004 දී කෘෂි විද්‍යා අංශය යටතේය. පසුව ජල කළමනාකරණ සහ භූගෝලීය තොරතුරු පද්ධති පිළිබඳ අංශය 2006 වසරේ දී ස්ථාපිත අතර ඩබ්ලිව්.එම්.යූ.කේ. රත්නායක මහත්මිය විසින් පර්යේෂණ ආරම්භ කරන ලදී.

වල් පැලෑටි කළමනාකරණය, පොහොර යෙදීම, පළිබෝධ සහ රෝග පාලනය වැනි වී වගාවේ බොහෝ ක්‍රියාකාරකම් වල ජලය වැදගත් කාර්යභාරයක් ඉටු කරයි. වී වල ගුණාත්මකභාවය සහ අස්වැන්න තීරණය කිරීමේදී ජලය වැදගත් වන අතරම, ලවණතාව, ක්ෂාරීයතාව, යකඩ විෂ වීම වැනි තත්වයන් නිර්මාණය කරන පාරිසරික ගුණාත්මක භාවයට ද බලපෑම් කරයි. තවද විවිධ අවධි වලදී වී ශාකයේ වර්ධනයට ද බලපායි.
එබැවින් වී වගාවේදී ජල කළමනාකරණය ඉතා වැදගත් වේ.

කෘෂිකාර්මික සම්පත් කළමනාකරණය, සහල් බෝග හඳුනා ගැනීම, ප්‍රදේශ තක්සේරු කිරීම, ඉඩම් යෝග්‍යතාවය තක්සේරු කිරීම, වගා දින දර්ශනය හඳුනා ගැනීම, යෙදවුම් හා භාණ්ඩ තක්සේරු කිරීම, ජල භාවිතය සහ ජලය ලබා ගත හැකි ස්ථාන සිතියම්කරණය, වී ගොවිතැනෙහි ජල කළමනාකරණය, පොහොර කාර්යක්ෂමව භාවිතා කිරීම, බෝග හානිය තක්සේරු කිරීම සහ පාලන පියවර හඳුනා ගැනීම, අස්වැන්න පුරෝකථනය කිරීම සහ අලෙවිකරණය සඳහා භූගෝලීය තොරතුරු පද්ධති (GIS ) ඇතුළු භූ-තොරතුරු භාවිතා කළ හැකිය. එබැවින් වී වගාවේදී භූගෝලීය තොරතුරු පද්ධති (GIS ) මෙවලමක් ලෙස භාවිතා කරයි.

අංශ ප්‍රධානී : ආචාර්ය ඩබ්ලිව්.එම්.යූ.කේ. රත්නායක , ප්‍රධාන කෘෂි විද්‍යාඥ (පාංශු විද්‍යාව – වී)