ප්‍රචාරණය

ස්වභාවිකව බීජ මඟින් ප්‍රචාරණය සිදුවන නමුත් බීජ ප්‍රරෝහණයට මාස 3 – 9 දක්වා වූ දිගු කාලයක් ගත වේ.

වගා කිරිම
වෙරළු පැළ සාර්ථකව වගා කිරීමට හොඳින් හිරු එළිය අවශ්‍යය. මනාව ජල වහනය සිදුවන පසක් තෝරා ගැනීමද වැදගත් වේ.

ක්‍ෂේත්‍රයේ වෙරළු පැළ සිටුවීමට, පැළ අතර පරතරය මීටර් 2-3 ක් පමණ වන සේ සෙන්ටි මීටර් 60×60×60 ප්‍රමාණයේ වලවල් සකසා ගත යුතුය. පසුව හොඳින් දිරාගිය ගොම හෝ කොම්පෝස්ට්, මතුපිට පස් හා වැලි සමාන ප්‍රමාණවලින් මිශ්‍රකර සාදාගත් මිශ්‍රණයකින් එම වළවල් පුරවා ගත යුතුය. වෙරළු පැළය සිටුවා ගත් මුල් අවධියේදී හොඳින් ජලය හා සෙවණ සැපයීම ඉතා වැදගත්ය.

මාස 6 කට වරක් කොම්පෝස්ට් හෝ කාබනික පොහොර භාවිතා කිරීම ද අවශ්‍ය නම් පලතුරු බෝග සඳහා නිර්දේශ කර ඇති රසායනික පොහොර මිශ්‍රණය යෙදීම මඟින් ද වඩාත් සාර්ථක ශාක වර්ධනයක් හා හොඳ අස්වැන්නක් ලබා ගැනීමට හැකිවේ.

අස්වැන්න

බීජ පැළයක් වසර 8-9 කින් සහ බද්ධ පැළයක් වසර 3-4 කින් ඵල දැරීම අරඹයි. සාමාන්‍යයෙන් වෙරළු ශාකයක් වසරකට දෙවරක් ඵල දරණ නමුත් සමහර ශාකවල වසර පුරාම ඵල හට ගෙන තිබෙනු දක්නට ලැබේ. හොඳින් වැඩුණු බීජ ශාකයකින් වසරකට වෙරළු කිලෝ ග්‍රෑම් 60-100 පමණ ලබාගත හැක.පැරණි අතු, ඵල හටගත් අතු, මැරී ගිය හෝ රෝගී අතු සහ පළිබෝධ හානි වූ අතු කප්පාදු කිරිමෙන් හා පොහොර යෙදීමෙන් වෙරළු ඵල හට ගැනීමේ හැකියාව වැඩි දියුණු කළ හැකිය.

අස්වනු නෙළූ පසු ස්වාභාවික තත්ත්ව යටතේ, ඉදුණු ගෙඩි කල්තබා ගැනීම අපහසු අතර, පළුදු නොවූ පැසුණු ගෙඩි නම් සාමාන්‍ය තත්ත්ව යටතේ සතියක පමණ කාලයක් ගබඩාකර තැබීමට පුළුවන.

නමුත් වෙරළු පැළ ළපටි අවධියේදී කොළ හකුලුවන්නන්ගේ (Leaf roller) හානි දැකගත හැකි අතර එවැනි පත්‍ර ඉවත්කර පළිබෝධකයින් මර්ධනය කළ හැක.