සමාජ ආර්ථික හා සැලසුම් මධ්‍යස්ථානය ශ්‍රී ලංකා කෘෂිකර්ම දෙපාර්තමේන්තුවේ ප්‍රධාන මධ්‍යස්ථානයකි. මුලින්ම 1960 ගණන්වල අගභාගයේදී එය කෘෂිකර්ම දෙපාර්තමේන්තුවේ හි ව්‍යාප්ති අංශය යටතේ කුඩා ඒකකයක් ලෙස ස්ථාපිත වී ඇති අතර, එය 1970 දශකයේ මුල් භාගයේදී කෘෂිකාර්මික ආර්ථික විද්‍යා අංශය ලෙස කෘෂිකර්ම දෙපාර්තමේන්තුවේහි ස්වාධීන ආයතනයක් ලෙස නම්කරන ලදී.

      1976 දී තවත් වගකීම් කිහිපයක් එකතු කරමින් එය කෘෂිකාර්මික ආර්ථික විද්‍යාව, ගොවිපල කළමනාකරණය සහ සංඛ්‍යාලේඛන අංශය ලෙස ජ්‍යෙෂ්ඨ කෘෂිකාර්මික ආර්ථික විද්‍යාඥවරයකුගේ ප්‍රධානත්වයෙන් නම් කරන ලදී. තවදුරටත් මෙම අංශය විසින් මෙහෙයවනු ලබන ක්‍රියාකාරකම්වල වැදගත්කම සැලකිල්ලට ගනිමින් එය කෘෂිකාර්මික ආර්ථික විද්‍යා අංශය ලෙස නම් කරන ලදී. 

      1984 දී කෘෂිකර්ම ආර්ථික විද්‍යාව හා සැලසුම්කරණය යන අංශය ලෙස නැවත නම් කිරීම සිදු කරන ලදී. 1994 කෘෂිකර්ම දෙපාර්තමේන්තුවේ ප්‍රතිව්‍යුහගතකරණයේදී අධ්‍යක්ෂවරයකු යටතේ සමාජ ආර්ථික හා සැලසුම් මධ්‍යස්ථානය (SEPC) ලෙස නම් කරන ලදී. 1998 දී ව්‍යාපෘති ඇගයුම් හා මෙහෙයුම් ඒකකය (PEMU) මෙම මධ්‍යස්ථානයට ඒකාබද්ධ කරන ලදී.  

       2004 දී සමාජ ආර්ථික පර්යේෂණ හා ප්‍රතිපත්ති විශ්ලේෂණය ගෝලීය වෙළඳපොළ, නවීන තාක්‍ෂණය යොදා ගැනීම, පසු අස්වනු හා සැකසුම් කිරීම, සම්පත් උපයෝජනය සහ පාරිසරික ආර්ථික විද්‍යාව, කෘෂිකර්ම අලෙවිකරණය සහ ආහාර සුරක්‍ෂිතතාව පිළිබඳ අවධානය යොමු විය. පර්යේෂණ න්‍යාය පත්‍ර හඳුනාගෙන ප්‍රමුඛතාවය ලබා දීම සහ ආහාර හිඟතාවය පිළිබඳ ගැටලු විසඳීමේදී උපාය මාර්ග සංවර්ධනය කිරීමේදී ප්‍රතිපත්ති සම්පාදකයින්ට අවශ්‍ය උපදෙස් ලබාදීම මගින් කෘෂිකර්ම දෙපාර්තමේන්තුවෙහි විවිධ වැඩසටහන් විධිමත් කිරීමට මෙම මධ්‍යස්ථානය දායක විය. ගෝලීය හා ජාතික  වෙනස්කම් වලට අනුව ආහාර බෝග අංශයේ සම්පත් පරිහරණයට අදාළ ප්‍රධාන සමාජ ආර්ථික ගැටලු විමර්ශනය හා වාර්තා ඉදිරිපත් කිරීම සිදුකරන ලදී. ඊට අමතරව, කන්න හා දිස්ත්‍රික් පදනම පාදක කරගත් පිරිවැය සහ ප්‍රතිලාභ පිළිබඳ දත්ත සමුදායක් ගොඩනැගීමේ පුළුල් වැඩසටහනක් අඛණ්ඩව සිදු කෙරිණි.