වැටකොළු (Luffa)



උද්භිත විද්‍යාත්මක නාමය - ලුප්ෆාඇකියුටැන්ගියුලා (Luffaacutangula)
කුලය - කුකර්බිටේසි

නිර්දේශිත ප්‍රභේද

LA 33



අඳුරු තද කොළ පැහැති දිගටි කරල් හටගන්නා ප්‍රභේදයකි. පළමු අස්වැන්න දින 60-70 කදී ලබාගත හැක. අස්වැන්න හෙක්ටයාරයට ටොන් 20 කි.

ආසිරි

සෙන්ටිමීටර් 30 පමණ දිගකින් යුත් කොළ පැහැති කරල් හටගනී. පළමු අස්වැන්න දින 60 - 70 දී ලබාගත හැක.

හෙක්ටයාරයකට ටොන් 8 පමණ සාමාන්‍ය අස්වැන්නක් ලබාගත හැකිය.

ගන්නොරුව ආරි

සිටුවා දින 30 කින් පමණ මල් පිපීම ආරම්භ වේ. පළමු අස්වැන්න දින 45 කදී නෙලාගත හැක. දිගටි, ලාකොළ පැහැති කරල් හටගනී. දින 90 ක් පමණ අස්වැන්න ලබාගත හැක. අස්වැන්න හෙක්ටයාරයට ටොන් 30 කි.

දේශගුණික අවශ්‍යතා

උෂ්ණ දේශගුණික තත්ත්ව ප්‍රියකරන බෝගයකි. මුහුදු මට්ටමේ සිට මීටර් 500ක් පමණ උස් වූ ප්‍රදේශ දක්වා සාර්ථකව වැටකොළු වගාකළ හැකිය. තද වර්ෂාව සහිත කාලගුණික තත්ත්ව වගාවට හිතකර නොවේ.

වගා කාලය
තෙත් කලාපයේ වසර පුරාම ද වියළි කලාපයේ මහ කන්නයේදී ද ප්‍රධාන වශයෙන් වැටකොළු වගාකෙරේ. යල් කන්නයේ ජල සම්පාදනය යටතේ වියළි කලාපීය ප්‍රදේශවල මෙම බෝගය සාර්ථකව වගාකළ හැකිය. කෙසේ වුවද තද වර්ෂාව සහිත කාලගුණික තත්ත්ව පවතින කාල සීමාවන් මඟහරවා වගාකළ යුතුය.


පස
ඉතා හොඳින් ජලය බැස යන කාබනික ද්‍රව්‍ය අඩංගු වැලි ලෝම් පසක් වගාවට වඩා සුදුසුය. පසෙහි පී.එච්. අගය 5.5 - 7.5 පමණ වීම යෝග්‍ය වේ.

බිම් සැකසීම

සෙන්ටිමීටර් 30 ක් පමණ ගැඹුරට බිම පෙරළා කැට පොඩි කර ගන්න. වළවල් නියමිත පරතරයට සකසා ගන්න. වගාව තුළ අනවශ්‍ය පරිදි ජලය රඳා සිටීම වළකා ගැනීම සඳහා ගැඹුරු කානු කිහිපයක්ද සකස් කර ගන්න.

බීජ අවශ්‍යතාවය

හෙක්ටයාරයකට කිලෝග්‍රෑම් 3

වගා පිළිවෙත්

පරතරය
පේලි අතර සහ පැළ අතර පරතරය මීටර් 1.5 කි. (මීටර් 1.5 x මීටර් 1.5)

බීජ සිටුවීම
බීජ පැය 24 ක් පමණ ජලයෙන් පොඟවන්න. එක් වලක එකිනෙකට තරමක් දුරින් බීජ 3 - 4 පමණ සිටුවන්න. ඉන්පසු සිටවූ බීජවලට හොඳින් ජලය සපයන්න.

පැළ තුනී කිරීම
බීජ පැළවී සති 2 පමණ ගතවූ පසුව එක් ස්ථානයක නිරෝගී පැළ 2 පමණක් ඉතිරිකර සෙසු පැළ ගලවා දමන්න.

වැල් පුහුණු කිරීම
වැටකොළු වගාවකින් සාර්ථක ප්‍රතිඵල ලබා ගැනීම සඳහා මීටර් 2 පමණ උස පන්දලමකට වැල් යොමුකළ යුතුයි. මේ සඳහා මීටර් 3 පමණ පරතරයට ශක්තිමත් කණු සිටුවා සිරස් අතට හෝ තිරස් අතට ලණුවලින් හෝ කම්බිවලින් පන්දලම සකසා ගත හැකිය. පන්දලම දක්වා වැලෙහි ප්‍රධාන කඳෙන් හට ගන්නා අංකුර ඉවත් කරන්න.

පොහොර යෙදීම
හොඳින් දිරූ කාබනික පොහොර හෙක්ටයාරයට ටොන් 10 ක් පමණ යොදන්න. මෙයට අමතරව පහත සඳහන් අන්දමට රසායනික පොහොරද යොදන්න.

මූලික පොහොර බීජ සිටුවීමට දින 2 - 3 කට පෙර යොදන්න. 12

වල් පැළෑටි පාලනය
වැටකොළුවලට ඇත්තේ නොගැඹුරු මූල පද්ධතියකි. එනිසා වල් පැළෑටි පාලනය කිරීමේදී මුල්වලට හානි නොවන පරිදි කටයුතු කිරීමට වගබලා ගන්න.

අස්වැන්න නෙළීම

අස්වනු නෙළීමට පෙර දින සවස හොඳින් භෝගයට ජලය යොදන්න. මල් පිපී දින 14 කින් පමණ අස්වැන්න ලබාගත හැක. කරලට හානි නොවන පරිදි නටුව සමඟම අස්වැන්න නෙළන්න. භෝගයේ වයස දින 60-70 දී පළමු අස්වැන්න ලබා ගත හැකිය. ඉන්පසු දින 4 පමණ වරක් බැගින් මාස 1 1/2-2 පමණ කාලයක් තුලදී අස්වනු වාර 10-15 පමණ නෙළාගැනීමට පිළිවන.

අස්වැන්න සැකසීම

නෙළාගත් කරල් මතට තද හිරු රැස් වැටීමෙන් වළකාගන්න. කරල්වලට හානි නොවන සේ හොඳින් වාතාශ්‍රය ලැබෙන පරිදි කූඩවල අසුරන්න.

රෝග හා පළිබෝධ හානි

කෘමි පාලනය

ඉල් මැස්සා
ඉල් මැස්සාගේ කීටයින් විසින් වැටකොළු කරල තුළ සිදුකරන හානිය නිසා කරල් කුණුවී යයි. මෙම හානිය වලකා ගැනීමට කෘමිනාශක යෙදීම අත්‍යාවශ්‍ය නොවේ. සෙන්ටිමීටර් 15 පළල හා සෙන්ටිමීටර් 40 පමණ දිග දෙපැත්තෙන්ම විවෘත වූ පොලිතීන් කැබලිවලින් ලපටි කරල් ආවරණය කරන්න. මෙම පොලිතීන් කැබලි ගෝනි ලණු වලින් නටුවට හෝ වැලට ගැටගසන්න. එමඟින් ඵල ආරක්ෂා වේ.

පාලනය

- පෙර කන්නයේ ඉතිරිව ඇති බෝග අවශේෂ විනාශ කිරීම.
- වගාව අවට ඇති වෙනත් ධාරක ශාක ඉවත් කිරීම (කෝවක්කා, ලබු, නියං වැටකොළු)

  • ක්‍යුලියෝ යෙදූ පෙරමෝන උගුල් යොදා කෘමි ගහණය පාලනය කිරීම. අක්කරයට උගුල් 04 ක් පමණ ස්ථානගත කළ යුතුය.

- හානි වූ කරල් කළු පොලිතීන් බෑගයකට එකතු කර කට බැඳ අව්වේ තැබීම හෝ ගැඹුරින් වළ දැමීම.
- හැකි තරම් ඵල ආවරණය කිරීම. මේ සඳහා තුනී පොලිතීන්, ඝනකම් කඩදාසි හෝ රෙදි යොදා ගත හැකිය. පොලිතීන්
  ආවරණය ඵලයට වඩා අඟල් 6 ක් පමණ දිග විය යුතුය. එහි යටි කෙළවර විවෘතව තැබිය යුතුය.
- ප්‍රෝටීන ඇම/ ස්පිනොසාඩ් කෘමි නාශකය ජලය මිලිලීටර් 400 මිලිලීටර් 20/ ජලය ලීටර් 16 අනුපාතයට මිශ්‍රකළ යුතුය.

මෙම මිශ්‍රණය වාණිජ වගාවක් සඳහා හෙක්ටයාරයකට ස්ථාන 200 - 400 ක් වන ලෙස යොදන්න. ගෙවතු සඳහා ඉහත මිශ්‍රණයෙන් මිලිලීටර 25 ට ජලය ලීටර් 1 ක් වන අනුපාතයට සාදා ගන්න. එක් ස්ථානයකට ඉසින මිශ්‍රණය ප්‍රමාණය මිලිලීටර් 200 - 400ක් මල් පිපීම ආරම්භ වී අස්වැන්න අවසන් වන තුරු දින 5 - 7 ට වරක් උදේ 7 - 9 අතර කාලය තුළ පත්‍ර වල යටි පැත්තට යොදන්න. වර්ෂාවට සේදී ගියහොත් නැවත ඉසින්න.

අවුලකපෝරා කෘමියා

භෝගයේ පත්‍ර වලට හා මුල් වලට හානි කරයි. හොඳින් බිම් සැකසීම, පස හිරුඑළියට නිරාවරණය කිරීම මඟින් කෘමි ගහණය අඩු කර ගත හැකිය. හානිය මුල් අවස්ථාවේදීම පාලනය කළ යුතුයි. මේ සඳහා නිර්දේශිත කෘමිනාශකයක් යොදන්න.

මේ සඳහා නිර්දේශිත කෘමිනාශක

කෘමිනාශකය

දියකළ යුතු ප්‍රමාණය

දින 10 කට වරක් කුඩා පැළ අවධියේ

ක්ලෝරැන්තැනිල්ප්‍රෝරෝල් 185g/lSC

මිලිලීටර් 32/ ජලය ලීටර් 16

ස්පිනෝසාඩ් 25g/l SP

මිලිලීටර් 16/ ජලය ලීටර් 16

ලොකු වැල් සඳහා දින 14 ට වරක්

තයෝසයික්ලාම් 50% SP

ග්‍රෑම් 25/ ජලය ලීටර් 10

රෝග පාලනය

පසෙහි දිගු කාලයක් ජලය රදා පැවතුනහොත් පාමුල ප්‍රදේශය දිලීර වර්ග නිසා කුණු වීමකට භාජනය විය හැකිය.

නිර්දේශිත දිලීරනාශකක් වැල පාමුල ප්‍රදේශයට යෙදීම හා පසෙහි ජලවහනය දියුණු කිරීම මඟින් මෙම තත්ත්වය මඟ හරවා ගත හැකිය. (වට්ටක්කා වගාවේ රෝග පාලනය බලන්න.)

වැටකොළු වගාව පිළිබඳ වැඩිදුර තොරතුරු