කරවිල (Bitter gourd)

උද්භිද විද්‍යාත්මක නාමය -මොමෝඩිකා බාරන්ටියා (Momordica charantia)
කුලය - කුකර්බිටේසි
ප්‍රභේද

එම්.සී. 43



මධ්‍යම ප්‍රමාණයේ ලා කොළ පැහැති කරල් මතුපිට දත් වැනි නෙරුම් පිහිටා ඇත.

තින්නවේලි සුදු



තරමක් විශාල කරල් සුදු පැහැතිය. කරල් මතුපිට දිග අතට අඛණ්ඩව විහිදුන නෙරුම් ඇත.

මාතලේ ග්‍රීන්


මධ්‍යම ප්‍රමාණයේ තද කොළ පැහැති ඵල හටගනී. කරලේ මතුපිට අඛණ්ඩ දාර සහිතය.

නීරෝගී


නව දෙමුහුම් ප්‍රභේදයකි. ලා කොළ පාටය. කරලේ දිග සෙන්ටිමීටර් 30 පමණ වේ. කරලේ මතුපිට අඛණ්ඩ සුමට දාර සහිතයි.

දේශගුණික අවශ්‍යතා සහ පස

මුහුදු මට්ටමේ සිට මීටර් 1200 පමණ උස් වූ ප්‍රදේශ දක්වා මෙය සාර්ථකව වගාකළ හැකිය.

පස
කාබනික ද්‍රව්‍ය බහුල, හොඳින් ජලය බැසයන පස් වඩා සුදුසුය. පසෙහි තිබිය යුතු පී.එච්.අගය 5.5 - 7.5 කි.

බිම් සැකසීම

සෙන්ටිමීටර් 20-30 ක් පමණ ගැඹුරට පස පෙරළා කැට පොඩිකර ගන්න.

සෙන්ටිමීටර් 30x30x30 ප්‍රමාණයේ වළවල් නිසි පරතරයට සකසා දිරාපත් වූ කාබනික පොහොර හා මතුපිට පස් වලින් පුරවන්න.

බීජ අවශ්‍යතාවය
හෙක්ටයාරයකට කිලෝග්‍රෑම් 6 කි.
වගා පිළිවෙත්

පරතරය

මීටර් 1.5 x මීටර් 1

සිටුවීම

මහ - ඔක්තෝම්බර් - නොවැම්බර් මාස වලදී යල - අප්‍රේල් - මැයි මාස වලදී එක් වළක බීජ 3 බැගින් සෙන්ටිමීටර් 2 - 3 ක් ගැඹුරින් සිටුවනු ලැබේ.

බීජ යෙදීමේදී බීජ අතර තරමක පරතරයක් තිබිය යුතුය. බීජ පැළවී සති 2 ක් ගතවූ පසු එක් වළක පැළ 2 බැගින් ඉතිරිකර ඉතිරි පැළය ගලවා දමන්න. බීජ සිටුවීමට පෙර රැයක් ජලයේ පෙඟවීමෙන් ප්‍රරෝහණය ඉක්මන් කර ගත හැකිය.

මෙයට අමතරව කුඩා පොලිතීන් බඳුන්වල බීජ සිටුවා සකසා ගන්නා පැළ සිටුවීම ද කළ හැකිය. මෙමඟින් අයහපත් කාලගුණික තත්ත්ව යටතේ බීජ සිටුවීමෙන් සිදුවිය හැකි හානි වළකි.

වැල් පුහුණු කිරීම

බීජ සිටුවා සති 3 පමණ ගතවූ පසුව මීටර් 2 ක් පමණ උස ශක්තිමත් මැස්සක් (පන්දලමක්) වෙත වැල් යොමු කරන්න.

පන්දලමට පහළින් වැලෙහි හට ගන්නා පාර්ශ්වික අංකුර ඉවත් කරන්න.

පොහොර යෙදීම

වළවල් සැකසීමේදී යෙදූ කාබනික පොහොරවලට අමතරව පහත සඳහන් අන්දමට රසායනික පොහොර ද වගාවට යොදන්න.

ජල සම්පාදනය

වගාවට ප්‍රමාණවත් වන පරිදි පසෙහි තෙතමනය නිසි ලෙස පවත්වා ගැනීම සඳහා අවශ්‍ය අවස්ථවාලදී ජල සම්පාදනය කරන්න. පසෙහි අනවශ්‍ය පරිදි ජලය එක් රැස්වීම වගාවට අහිතකරය. වියළි කාලවලදී වැල් අවට වසුනක් යෙදීමෙන් පස ඉක්මණින් වියළී යාම වළකී.

යෙදිය යුතු කාලය

යූරියා කි.ග්‍රෑ/ හෙක්.

ත්‍රිත්ව සුපර් පොස්පේට් කි. ග්‍රෑ/

හෙක්. මියුරියේට් ඔෆ් පොටෑෂ් කි. ග්‍රෑ/ හෙක්.

මූලික පොහොර

75

200

60

පැළ මතුවී සති 4 පසු

75

-

60

පැළ මතුවී සති 8 පසු

75

-

60


වල් පැළෑටි පාලනය

පැළ කුඩා කාලයේදී වළවල් අසල වල් පැළ උදුරා දමන්න. වගාවේ පසු කාලයේදී මුල් වලට හානි නොවන පරිදි වල් පැළ උදළු ගා ඉවත් කරන්න.

අස්වැන්න නෙළීම

හොඳින් වැඩී මෝරා ඇති අවස්ථාවේ කරල් නෙළාගන්න. වගාවට දින 60 - 75 වූ විට පළමු අස්වැන්න ලැබේ. ඉන්පසු දින 4 කට පමණ වරක් බැගින් අස්වනු වාර 10 - 14 පමණ ලබාගත හැකිය.

අස්වැන්න

හෙක්ටයාරයකට ටොන් 20 පමණ අස්වැන්නක් ලබාගත හැකිය. කරල්වලට හානි නොවන පරිදි අසුරා වෙළඳපොළට යවන්න.

මිහිකත දිණුවෝ
ගොවිබිමට අරුණළු
ක්ෂේත්‍ර ගැටළු
රෝග හා පළිබෝධ හානි
කෘමි පාලනය

ඉල් මැස්සා

කරලේ වර්ධනයේ ඕනෑම අවස්ථාවකදී ඉල් මැස්සාගේ හානියට ලක්විය හැකිය. ඉල් මැස්සාගේ ගැහැණු සතුන් කරල මතුපිට සිදුරු කර බිත්තර දමනු ලැබේ. ඉන් පිටවන කීටයින් කරවිල කරල තුළ මාංශලය ආහාරයට ගනිමින් සිදුකරන හානිය නිසා කරල් කුණු වී වැටී යයි.

පාලනය

- පෙර කන්නයේ ඉතිරිව ඇති බෝග අවශේෂ විනාශ කිරීම.

- වගාව අවට ඇති වෙනත් ධාරක ශාක ඉවත් කිරීම (කෝවක්කා, ලබු, නියං වැටකොළු)

  • ක්‍යුලියෝ යෙදූ පෙරමෝන උගුල් යොදා කෘමි ගහණය පාලනය කිරීම. අක්කරයට උගුල් 04 ක් පමණ ස්ථානගත කළ යුතුය.

- හානි වූ කරල් කළු පොලිතීන් බෑගයකට එකතු කර කට බැඳ අව්වේ තැබීම හෝ ගැඹුරින් වළ දැමීම.

- හැකි තරම් ඵල ආවරණය කිරීම. මේ සඳහා තුනී පොලිතීන්, ඝනකම් කඩදාසි හෝ රෙදි යොදා ගත හැකිය. පොලිතීන්   
  ආවරණය ඵලයට වඩා අඟල් 6 ක් පමණ දිග විය යුතුය. එහි යටි කෙළවර විවෘතව තැබිය යුතුය.

- ප්‍රෝටීන ඇම/ ස්පිනොසාඩ් කෘමි නාශකය ජලය මිලිලීටර් 400 මිලිලීටර් 20/ ජලය ලීටර් 16 අනුපාතයට මිශ්‍රකළ යුතුය.

මෙම මිශ්‍රණය වාණිජ වගාවක් සඳහා හෙක්ටයාරයකට ස්ථාන 200 - 400 ක් වන ලෙස යොදන්න. ගෙවතු සඳහා ඉහත මිශ්‍රණයෙන් මිලිලීටර 25 ට ජලය ලීටර් 1 ක් වන අනුපාතයට සාදා ගන්න. එක් ස්ථානයකට ඉසින මිශ්‍රණය ප්‍රමාණය මිලිලීටර් 200 - 400ක් මල් පිපීම ආරම්භ වී අස්වැන්න අවසන් වන තුරු දින 5 - 7 ට වරක් උදේ 7 - 9 අතර කාලය තුළ පත්‍ර වල යටි පැත්තට යොදන්න. වර්ෂාවට සේදී ගියහොත් නැවත ඉසින්න.

ගඩු මැස්සා

මෙම කෘමියාගේ කීටයා කරවිල වැල තුළ සිට සිදුකරන හානිය නිසා එහි වැඩීම බාලවී කුරු වේ. කීටයා හානි කරන ස්ථානයෙහි වැල ප්‍රවේශමෙන් දෙකට පලා බැලූ විට මෙම කීටයින් නිරීක්ෂණය කළ හැකිය.

පාලනය

ප්‍රධාන කඳෙහි හෝ අතුවල ඉදිමීමක් සේ පවතින ගඩු මැස්සාගේ හානිය පිළිබඳව අවධානයෙන් සිටින්න. මූලික හානි කිරීම් වලදී හැකි නම් ගඩුවට යටින් කපා එම කොටස් පුළුස්සා දමන්න. හානිය වැඩි අවධි වලදී ෆෙනොෆොස් කෘමි නාශකය හෝ තයෝසයික්ලාම් කෘමිනාශකය භාවිතා කළ හැක. (වැඩි විස්තර සඳහා කෘමිනාශක නිර්දේශය බලන්න)

රෝග පාලනය

යටිපුස් රෝගය

පත්‍ර මත කහ පැහැති කෝණාකාර පුල්ලි හටගනී. මෙම පුල්ලි පසුව දුඹුරු පැහැ වේ. අළු - සුදු පැහැති දිලීර බීජාණු පත්‍රයේ යටි පැත්තේ හට ගනී. නිර්දේශිත දිලීර නාශකයක් මේ සඳහා යොදන්න. (පිපිඤ්ඤා වගාවේ රෝග පාලනය බලන්න.)

මේ සඳහා නිර්දේශිත දිලීර නාශක

දිලීරනාශකය

ජලය ලීටර් 10 ක දියකළ යුතු ප්‍රමාණය

මැන්කොසෙබ් 64% + මෙටලැක්සිල් 8% WP

ග්‍රෑම් 12.5

මෙට්රම් 55% + පයිරක්ලොස්ට්‍රොබින් 5% WG

ග්‍රෑම් 20

ඇසොස්ට්‍රොබින් 250g/l SC

මිලිලීටර් 10

කෙරොක්සිම් මීතයිල් 500g/l EC

මිලිලීටර් 14

පිටිපුස් රෝගය

වැඩි පරිසර උෂ්ණත්වයක් පවතින අවස්ථාවලදී වැළඳිය හැකි රෝගයකි. රෝගී පත්‍ර කහපාට වේ. පත්‍රයේ දෙපසම සුදු පැහැති බීජාණු දැකගත හැකිය.

මේ සඳහා නිර්දේශිත දිලීර නාශක

දිලීරනාශකය

ජලය ලීටර් 10 ක දියකළ යුතු ප්‍රමාණය

ෆ්ලුට්‍රයිපොල් 25% SC (Flutriafol) සාන්ද්‍ර තෛලෝදය, 25%

මිලිලීටර් 10

පොටෑසියම් බයිකාබනේට් 82% කුඩු

ග්‍රෑම් 15

කැබිරියෝටොප්

ග්‍රෑම් 20

කෙරොක්සිම් මීතයිල් (Krescxim methyl) 500g/EC

ග්‍රෑම් 14

විචිත්‍ර වෛරස් රෝගය

මෙම රෝගය කුඩිත්තන් නිසා පැතිරේ. කොළ හා කහ පැහැති විචිත්‍රයක් පත්‍ර මත ඇති වේ. රෝගී පත්‍ර රෝල් වී විකෘති වේ. වැල්වල වර්ධනය බාල වේ. ශාක කුරු වේ. රෝගී වැල් දුටු විගස ගලවා විනාශ කරන්න. කුඩිත්තන් පාලනය මඟින් රෝගය පැතිරීම පාලනය කෙරේ. නිර්දේශිත කෘමිනාශක පැළ සිටවා දින 10 සිට අස්වනු නෙළන අවධිය ආරම්භ වන තෙක් දින 10 - 12 කට වරක් යොදන්න.

 මේ සඳහා නිර්දේශිත කෘමිනාශක

කෘමිනාශක

ජලය ලීටර් 16 ක දියකළ යුතු ප්‍රමාණය

බියුපොෆේසීන් 10% WP

ග්‍රෑම් 9.6

සල්ෆොක්සෆ්ලෝර් 50% WG

ග්‍රෑම් 4.8

පයිමෙට්ට්‍රොසීන් 50% WG

ග්‍රෑම් 8

ඇබමැක්ටීන් 18g/ LEC

මිලිලීටර් 9.6

ප්‍රොෆෙනොෆොස් 50% /EC

මිලිලීටර් 48

 

පසු අස්වනු කටයුතු
ආශ්‍රිත නිෂ්පාදන
අලෙවිකරණය
බීජ නිෂ්පාදනය
විශේෂ වගා තාක්ෂණ ක්‍රම